Մայր Աթոռի Տեղեկատվական համակարգի երկարաշունչ հաղորդագրութիւնը. ԱՆԹՕ

Posted on April. 7. 2019

Լսելէ ետք, Պետրոս Հաճեանի հեռատեսիլի ծրագրէն Բժ. Յարութ Մեսրոպեանի հարցազրոյցը «Հայ Կեանք» շաբաթաթերթի խմբագիր՝ Աբօ Չափարեանի հետ, ստիպուած հանձնեցի «Հայ Կեանք»ի խմբագրութեան ուշադրութեան ներքեւի գրութիւնս։
Մայր Աթոռի Տեղեկատվական համակարգ
Մարտ 24, 2019
Ամենայն Հայոց Կաթողիկոսն ընդունեց
Հայկական Բարեգործական Ընդհանուր Միության նախագահին
«Զրույցի ընթացքում Ամենայն Հայոց Կաթողիկոսը և ՀԲԸՄ նախագահն անդրադարձան Մայր Աթոռի և ՀԲԸՄ միջև ձեւավորված բազմամյա համագործակցությանը, որն ընդգրկում է եկեղեցաշինական, կրթական և սոցիալական զանազան ծրագրեր: Մասնավորապես կարեւորվեցին ՀԲԸՄ-ի աջակցությամբ տարիներ շարունակ համատեղ իրականացվող Հայորդյաց տների ու բարեգործական ճաշարանների գործունեությունն ու դրանց ընդլայնման հնարավորությունները,..»:
Իսկ Մարտ 12, 2019-ին,
Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ ԱՅՑԵԼՈՒԹԻՒՆԸ Հ.Բ.Ը.Մ.-Ի ՆԱԽԱԳԱՀ ՊԵՐՃ ՍԵԴՐԱԿԵԱՆԻ
«Մտերմիկ մթնոլորտին մէջ տեղի ունեցած երկար հանդիպումը առիթ հանդիսացաւ ընդհանուր քննութեան ենթարկելու Հայաստանի դիմագրաւած ներքին եւ արտաքին մարտահրաւէրները, ինչպէս նաեւ Հայաստան-Սփիւռք յարաբերութեանց յառաջիկայ հանգրուանի առնչուած խնդիրներ ու մօտեցումներ»:
Վերջին շրջանին, Հայկական Բարեգործական Ընդհանուր Միութեան նախագահի մաքուքային այցելութիւնները Մայր Աթոռ եւ Անթիլիաս մեզի մտածել կու տան, թէ շան գլուխը այլ տեղ պահուած է։ Մանաւանդ, որ այդ մաքուքային այցելութիւնները տեղի սկսան ունենալ, «Նոր Հայաստան Նոր Հայրապետ» Շարժման ստեղծումէն ետք։
Հրապարակուած հաղորդագրութիւնները մաշած ձայնապնակ կը յիշեցնեն, նոյն եւ նման։ Ասկէ կը հետեւցնենք, որ պրնգ նախագահը այլ նպատակներ կը հետապնդէ։ Այլապէս ի՞նչ կը նշանակէ հերթական հանդիպումները երկու կաթողիկոսներուն հետ։ Յետոյ երբուընէ ի վեր Բարեգործականը հետաքրքրուած էր Մեծի Տանն Կիլիկիոյ կաթողիկոսութեամբ ու անոր Գահակալով։
Կուզենք յիշեցնել պրն նախագահին, որ 1956-էն ի վեր, իր միութիւնը դադրած է ԸՆԴՀԱՆՈՒՐ միութիւն մը ըլլալէ, ու դարձած հատուածի մը միութիւնը։ Այո՛, մինչեւ 1955, մենք` հայկական վարժարանի աշակերտներս վայելած ենք Հայկական Բարեգործական Ընդհանուր Միութեան բազմատեսակ բարիքները։ Սակայն 1956-էն ետք կարծէք մենք այլեւս հայ չէինք եւ ոչ ալ հայկական վարժարանի աշակերտներ, երբ զլացան մեզ առաւօտեան կաթը, տարեկան պատուաստը։ Մեզ զրկեցին նաեւ Քեսապի կազդուրման կայանին մէջ մէկ ամիսով հանգստանալու հաճոյքէն։ Հիմա որ պրն.նախագահը յաճախակի օրէն հանդիպումներ կ՛ունենայ Արամ Ա. Վեհափառ Հայրապետին հետ, արդեօ՞ք այդ սխալը սրբագրելու ճիգ մըն է, որ կը կատարէ։ Կը կասկածիմ։
Երեւակայեցէք, Մտերմիկ մթնոլորտին մէջ երկար հանդիպումը առիթ հանդիսացած է ընդհանուր քննութեան ենթարկելու Հայաստանի դիմագրաւած ներքին եւ արտաքին մարտահրաւէրները, ինչպէս նաեւ Հայաստան-Սփիւռք յարաբերութեանց յառաջիկայ հանգրուանի առնչուած խնդիրներ ու մօտեցումներ:
Իսկ ինչ կը վերաբերի Ամենայն Հայոց Կաթողիկոսի հետ հանդիպման, տեւողութեան մասին խօսք չկայ։ Սակայն կարդալով Մայր Աթոռի Տեղեկատվական համակարգի պատրաստած երկարաշունչ հաղորդագրութիւնը, մարդ կը հետեւցնէ, որ նուազագոյնը չորս ժամ տեւած է, եւ որու ընթացքին, քննարկած են եղեր, «եկեղեցաշինական, կրթական և սոցիալական զանազան ծրագրեր»։
Մայր Աթոռի Տեղեկատվական համակարգի երկարաշունչ հաղորդագրութիւնը ընթերցողի ուշադրութեան յանձնելով, մնամ,
Ձերդ՝ ԱՆԹՕ

Leave a Reply

Your email address will not be published. Required fields are marked *