Վարչապետ Նիկոլ Փաշինեան. «Շատ Կարեւոր Կը Նկատեմ Հայաստանի Եւ Արցախի Իշխանութիւններու Միջեւ Արդիւնաւէտ Համագործակցութիւնը»

Posted on May. 28. 2020

22 մայիսին Ստեփանակերտի մէջ տեղի ունեցաւ ՀՀ վարչապետ Նիկոլ Փաշինեանի եւ Արցախի Հանրապետութեան նորընտիր նախագահ Արայիկ Յարութիւնեանի առանձնազրոյցը:
Փաշինեան իր խօսքին մէջ ըսաւ, որ Արցախի մէջ նկատած է ստեղծումը շատ լաւ մթնոլորտիանհրաժեշտ նկատելով այս մթնոլորտը այս մակարդակի վրայ պահելն է եւ աւելի զարգացնելը: «Շատ կարեւոր կը նկատեմ, որ Հայաստանի եւ Արցախի իշխանութիւններու միջեւ արդիւնաւէտ համագործակցութիւն տեղի ունենայ, եւ անոր համար կան անհրաժեշտ բոլոր նախադրեալները: Համոզուած եմ այդպէս ալ պիտի ըլլայ», նշեց ան:
Արայիկ Յարութիւնեան յայտնեց. «Մեր հասարակութիւնը ես կը դիտարկեմ իբրեւ մէկ ամբողջութիւն, չկայ Հայաստանի ժողովուրդ, Արցախի ժողովուրդ, կայ հայ ժողովուրդ եւ մենք այդ սկզբունքէն մեկնելով պէտք է պահենք մթնոլորտը, զարգացնենք: Այն նախադրեալները, որոնք այսօր ստեղծուած են Արցախի մէջ ոչ միայն բարոյահոգեբանական, այլեւ տնտեսութեան զարգացման, ընկերային ծրագիրներու, հայրենադարձութեան առումով, ամէն ինչ կարելի է իրականացնել միացեալ աշխատանքի շնորհիւ»:
Այնուհետեւ հանդիպումը շարունակուած է Հայաստանի եւ Արցախի արտաքին գործոց նախարարներ Զոհրաբ Մնացականեանի եւ Մասիս Մայիլեանի մասնակցութեամբ: Քննարկուած են երկու հայկական հանրապետութիւններու արտաքին գործոց նախարարութիւններու փոխգործակցութեան արդիւնաւէտութեան բարձրացման եւ արտաքին օրակարգի հարցերուն մէջ աւելի ներառական աշխատանք ծաւալելու վերաբերեալ հարցեր:
Նախագահ Յարութիւնեան լուսարձակի տակ առած է Արցախի միջազգային գերիշխանութեան բարձրացման գծով Հայաստանի Հանրապետութեան կարեւորագոյն դերակատարութիւնը` շեշտադրելով, որ այդ ուղղութեամբ համատեղ ջանքերը պէտք է անընդհատ աւելնան:

Leave a Reply

Your email address will not be published. Required fields are marked *