Մարմնամարզութիւն. Աշխարհի Բաժակի Մրցաշարք. Արթուր Դաւթեան Տիրացաւ Ոսկի Մետալին
Posted on March. 3. 2023
Գերմանիոյ Քոթպուս քաղաքին մէջ տեղի ունեցող աշխարհի մարմնամարզութեան բաժակի մրցաշարքի ծիրին մէջ, ողիմպիականի պրոնզէ մետալակիր, աշխարհի եւ Եւրոպայի ախոյեան Արթուր Դաւթեան, գերազանց ելոյթ մը ունենալով յենացանկի մրցումներու աւարտականին, հանդիսացաւ ախոյեան:
Հայաստանի մարմնամարզութեան հաւաքականին յառաջատարը ապահովեց 15.133 կէտ:
Դաւթեանէն առաջ Գագիկ Խաչիկեան նժոյգ ձեւի մրցումներուն գրաւած էր երկրորդ դիրքը, մինչ Արթուր Աւետիսեան հանդիսացած էր երրորդօղակներու մրցումներուն: Աշխարհի բաժակի այս հանգրուանի մրցումները վարկանշային են աշխարհի ախոյեանութեան անհատական մրցապայքարին համար, որոնց ընթացքին մարզիկները կը ստանան Փարիզի ողիմպիական խաղերուն իրենց տոմսերը: Աշխարհի մարմնամարզութեան բաժակի մրցաշարքին երկրորդ հանգրուանը տեղի պիտի ունենայ Քոթպուսէն անմիջապէս ետք Տոհայի մէջ (Քաթար), մինչ երրորդ հանգրուանը, որ տեղի պիտի ունենայ Պաքուի մէջ (Ազրպէյճան), Հայաստանի հաւաքականը պիտի չմասնակցի անոր: