Կռփամարտ. Հայաստանի Մարզիկները 9 Մետալի Տիրացան Մոլտովայի Միջազգային Մրցաշարքին
Posted on May. 10. 2023
Հայաստանի կռփամարտի ֆետերասիոնին մամլոյ քարտուղարութիւնը յայտնեց, որ Հայաստանի աւագ տարիքի կռփամարտի պատանիներու հաւաքականը, որ յաջող ելոյթներ ունեցաւ Մոլտովայի մէջ տեղի ունեցած կռփամարտի միջազգային մրցաշարքին, գրաւեց խմբային դասաւորման երկրորդ դիրքը:
Աշոտ Գրիգորեանի գլխաւորութեամբ մրցասպարէզ մեկնած բոլոր 9 մարզիկներն ալ բարձրացան պատուոյ հարթակ` Հայաստանին ապահովելով 4 ոսկի, 4 արծաթ եւ պրոնզ մետալ մը:
Հայաստանի համար ոսկի մետալ ապահովեցին Վաղարշակ Քէյեան (48 քկ), Տիգրան Յովսէփեան (50 քկ), Սամուէլ Սիրամարգեան (70 քկ) եւ Ալպերթ Յակոբեան (75 քկ): Այս մրցաշարքին, իրենց մասնակցութիւնը բերին եօթը երկիրներու մարզիկներ:
Նշենք, որ Մոլտովայի մէջ, հաւաքականին կողքին եղան նաեւ տեղւոյն հայ համայնքի ներկայացուցիչները: