Posted on November. 6. 2020
Հայաստանը կը շարունակէ հետեւողական քայլեր ձեռնարկել միջազգային ահաբեկչութեան դէմ պայքարին ուղղութեամբ՝ համագործակցելով բոլոր շահագրգիռ գործընկերներուն հետ։ Այս առնչութեամբ յայտարարութիւն տարածած է ՀՀ արտաքին գործոց նախարարութիւնըանդրադառնալով Ազրպէյճանի կողմէ Արցախի դէմ ռազմական գործողութիւններու համար ներգրաւուած օտարերկրեայ զինեալ ահաբեկիչներու
Արցախի Պաշտպանութեան բանակին կողմէ գերեվարման փաստին։
«Նոյեմբեր 1-ին, մարտական գործողութիւններու ընթացքին, Արցախի Պաշտպանութեան բանակի ստորաբաժանումներուն կողմէ գերեվարուած է Ազրպէյճանի կողմէ Արցախի դէմ ռազմական գործողութիւններու համար ներգրաւուած օտարերկրեայ զինեալ երկրորդ ահաբեկիչը, որ ներկայացած է իբրեւ Սուրիոյ Իտլիպ նահանգի Ճիսր ալ-Շուղուր շրջանի Զիյատիյա գիւղի բնակիչ Եուսուֆ Ալաապեթ ալ Հաճի: Նշենք, որ Հոկտեմբեր 30-ին Արցախի ՊԲ գերեվարել էր այլ զինեալ ահաբեկիչ մը եւս, որ ներկայացած էր իբրեւ Մըհրապ Մուհամմատ Ալ Շխայիր՝ Սուրիոյ Համա քաղաքէն։
Հայկական կողմը բազմիցս բարձրաձայնած է Թուրքիոյ կողմէ Մերձաւոր Արեւելքի տարբեր «թէժ կէտերէ», մասնաւորապէս՝ Սուրիոյ` իր վերահսկողութեան տակ գտնուող շրջաններէն եւ Լիպիայէն Արցախի ժողովուրդին դէմ վայրագութիւններ իրականացնելու նպատակով օտարերկրեայ զինեալ ահաբեկիչներու եւ ճիհատիստներու հաւաքագրման, տարածաշրջան տեղափոխման եւ տեղակայման մասին: Վերոնշեալ փաստը ներկայիս ոչ միայն հաստատուած է ԵԱՀԿ Մինսկի խումբի համանախագահ երկիրներու յատուկ ծառայութիւններու, մեր բազմաթիւ գործընկերներու եւ միջազգային հանրութեան կողմէ, այլեւ արդէն իսկ ահաբեկիչներու ուղղակի վկայութիւններով:
Իրենց վկայություններուն մէջ վերոնշեալ ահա-բեկիչները մանրամասն տեղեկատւութիւն փոխան-ցած են իրենց հաւաքագրման գործընթացին, «կեաւուր» (անհաւատներու) դէմ պայքարի համար ակնկալուելիք ամսական վճարներուն եւ իւրաքանչիւր «անհաւատի» գլուխ կտրելու համար «պարգեւավճարներու», ինչպէս նաեւ իրենց կողմէ իրականացուելիք ահաբեկչական ծրագրերուն մասին: Լեռնային Ղարաբաղի հակամարտութեան գօտի ճիհատիստներու տեղափոխումը կը բացայայտէ հակամարտութեան միջկրօնական բնոյթ հաղորդելու թուրք-ազրպէյճանական ղեկավարութեան նպատակը:
Ասիկա ահաբեկչութեան տարածման լիովին նոր դրսեւորում է, երբ ԵԱՀԿ տարածքին վրայ գտնուող հակամարտութեան գօտիին վրայ կը տեղակայուին Մերձաւոր Արեւելքէն օտարերկրեայ զինեալ ահաբեկիչներ եւ ճիհատիստներ, որ լուրջ սպառնալիք է միջազգային եւ տարածաշրջանի անվտանգութեան եւ կայունութեան համար:
Հայաստանը պիտի շարունակէ հետեւողական քայլեր ձեռնարկել միջազգային ահաբեկչութեան դէմ պայքարի ուղղութեամբ՝ համագործակցելով բոլոր շահագրգիռ գործընկերներուն հետ»,- նշուած է ԱԳՆ յայտարարութեան մէջ: