Հրապարակաւ Նահանգապետ Նիւսըմի Հետ՝ Պատուաստը Բազուկին Մէջ՝ «Քովիտ-19»ի Դէմ
Posted on March. 10. 2021
Մեր կեանքի ամէնէն աւելի մարտահրաւէր ունեցող տարիներէն մէկէն ետք, փապուղիին վերջաւորութեան լոյս կ՛երեւի— «Քովիտ-19»ի պատուաստները այստեղ են, եւ իմ վարչակազմը ճիգ կը թափէ վստահ ըլլալու, որ որեւէ համայնք ետ չմնայ:
«Քովիտ-19»ի պատուաստները անվնաս են եւ ազդու: Անոնք մեր լաւագոյն յոյսն են համաճարակին վերջ տալու: «Քովիտ-19»ի պատուաստը ստանալը անվճար է, նոյնիսկ եթէ կեցութեան թուղթ չունիք (անօրէն էք) կամ բժշկական ապահովագրութիւն չունիք:
Դեկտեմբերին, դաշնակցային կառավարութեան՝ պատուաստին օգտագործումը արտօնելէն ետք, մեր` Արեւմտեան Նահանգներու Գիտական Ապահովութեան Վերաքննութեան Խումբը հաստատեց, որ պատուաստները անվնաս են: Խումբը կը ներառէ երկրին մէջ հանրածանօթ, հանրային առողջապահութեան մասնագիտութեամբ գիտնականներ, որոնցմէ շատերը Քալիֆորնիայէն են:
Ճիշդ է որ պատուաստի պաշարները այժմ սահմանափակ են, մենք սերտ գործընկերութեամբ կ՛աշխատինք դաշնակցային կառավարութեան հետ՝ նահանգը աւելի շատ պատուաստներ հասցնելու համար:
Մինչ պատուաստի պաշարը սեղմ է, մենք պատուատումի նախապատուութիւն կու տանք ամէնէն շատ վտանգի դէմ յանդիման գտնուող քալիֆորնիացիներուն, ներառեալ՝ առողջապահութեան մարզին մէջ աշխատողներուն, 65 տարիքէն վեր անհատներուն, կրթութեամբ, մանուկներու հոգատարութեամբ, շտապ օգնութեան ծառայութեամբ, ուտեստեղէնի մշակումով եւ հողագործութեամբ զբաղողներուն: Այս կը նշանակէ, թէ խանութպանները, ճաշարաններու տէրերը, անոնք, որոնք ուտելիքի մշակման վայրերու մէջ կ՛աշխատին եւ շատ ուրիշներ այժմ կրնան նախապատուութիւն ունեցող համարուիլ: Եւ մենք ճիգ կը թափենք վստահ ըլլալու, որ «Քովիտ-19»էն ամէնէն շատ տուժած համայնքները՝ շատ յաճախ ափրիկեցի-ամերիկացիներ եւ էական աշխատանքներ կատարողներ, որոնք այս ճգնաժամին ընթացքին մեզ կը պահպանէին, պատուաստի մատչելիութիւն ունենան:
Մենք ներդրումներ կը կատարենք համայքին մէջ հաստատուած կազմակերպութիւններու մէջ եւ գործակցելով վստահելի պատգամատարներու հետ, որոնք համաճարակին ընթացքին կը մատակարարէին կարեւոր սպասարկութիւններ եւ տեղեկատուութիւն Քալիֆորնիոյ տարբեր համայնքներուն, որպէսզի կարենանք դաստիարակել, աշխուժացնել եւ մղել ժողովուրդը պատուաստուելու, երբ իրենց կարգը հասնի: Մենք նաեւ հանրային դաստիարակութեան արշաւի մը միջոցաւ կը կատարենք լրաբերութիւն՝ ստեղծելով իւրաքանչիւրին ի՛ր լեզուով բովանդակութիւն՝ մշակութային խոնարհութեամբ, հանդիպելով քալիֆորնիացիներուն, բառացիօրէն՝ ուր ալ գտնուին անոնք, պատուաստումի փոխադրական կայաններու միջոցաւ, որոնք տարածուեցան նահանգի համայնքային կեդրոնները, պաշտամունքի վայրերը եւ դարմանատուները:
Պատուաստումի կայաններ տեղադրուած են նահանգին տարածքին եւ մենք սերտօրէն կ՛աշխատինք համայնքային մեր գործընկերներուն հետ, որպէսզի վստահ ըլլանք, որ պատուաստները բաշխուին անոնց, որոնք ամէնէն շատ ժահրին վնասը կրեցին:
Դուք կրնաք հանդիպիլ տարազով մարդոց կամ ոստիկաններու, որոնք կը պաշտպանեն պատուաստումի կայանները: Անոնք այնտեղ են պատուաստ ստացող քալիֆորնիացիները պաշտպանելու. անոնք գաղթականութեան պաշտօնեաներ չեն:
Դաշնակցային կառավարութիւնը, նախագահ Պայտընի հովանիին տակ՝ վստահեցուց, որ պատուաստի կայաններուն կամ դարմանատուներուն մէջ գաղթականութեան օրինազանցութիւններու դէմ գործողութիւններ պիտի չկատարեն: «Քովիտ-19»ի պատուաստը ստանալու ընթացքին ձեզմէ պիտի չպահանջուի կեցութեան իրաւունքի որեւէ փաստաթուղթ:
Նաեւ, ձեր բժշկական տեղեկութիւնները անձնական են եւ չեն կրնար տրուիլ գաղթականութեան պաշտօնեաներուն: Պատուաստումները օտարներու՝ հանրային օժանդակութեան կանոնին ենթակայ չեն:
Բոլոր քալիֆորնիացիները կրնան արձանագրուիլ myturn.ca.gov կայքին վրայ, որպէսզի իրենց ծանուցուի, թէ երբ պատուաստը իրենց հասանելի կրնայ ըլլալ: Թեկնածու անձերը զանազան գաւառներու մէջ, ներառեալ՝ Լոս Անճելըս, Սան Տիէկօ, Ֆրեզնօ եւ Սան Ֆրանսիսքօ, կրնան գործածել My Turn-ը ժամադրութիւն մը ծրագրելու համար, մինչ յառաջիկայ շաբաթներուն ընթացքին այլ գաւառներ կը սկսին ժամադրութիւններու համար My Turn-ը գործածել:
My Turn- նաեւ հասանելի է անվճար «հաթլայն»ի մը միջոցով՝ 1-833-422-4255 հեռաձայնի թիւով: Հեռաձայնը պատասխանող պաշտօնեաները կը խօսին անգլերէն եւ սպաներէն, նաեւ երրորդ կողմի թարգմանութիւններ տրամադրելի են առաւել քան 250 լեզուներով: Ժամադրութիւն մը ծրագրելու համար կրնանք նաեւ ձեր բժիշկին հետ խօսիլ:
Պատուաստ ստանալէ ետք դիմակ կրելը շատ կարեւոր է. ձեր ձեռքերը յաճախ լուացէք եւ շարունակեցէք 6 ոտք հեռաւորութիւն պահել՝ ձեր համայնքին մէջ պաշտպանելու համար անոնք, որոնք տակաւին պատուաստ չեն ստացած:
Կը թելադրեմ բոլոր քալոֆորնիացիներուն, որ պատուաստուին անմիջապէս, երբ իրենց կարգը հասնի: Միասին մենք կրնանք համաճարակին վերջ տալ: